賭王何鴻燊聽日就94歲生日，今日二房就照例喺賭王生日捐錢俾香港公益金。

據知聽日生日，賭王會留喺屋企食飯唔會外出，而今晚四房就會同佢慶祝生日，聽日正日就到二房，三房就會喺賭王舊曆生日慶祝。而除咗二房今日有同賭王合照，四房亦都喺賭王大宅齊齊影全家福，超盈作狀錫錫爹哋，超欣就唔小心合咗眼，四太攬實賭王，而何猷君就當然要西裝骨骨咁賀爹哋啦。

四太接受《蘋果》訪問，表示與親友在家BBQ慶祝生日，細女超欣特登係英國返嚟一日，猷君都專登返嚟賀父親生日，四太表示：「屋企多人嚟，今晚燒野食，會畀D燒蕃薯、燒芋頭佢食，之後會切蛋糕。」四太笑言如常送「肉嘴」賀壽：「希望賭王身體健康，社會經濟繁榮。」不過睇相就係超盈送「肉嘴」喎。

至於生日禮物，四太笑言送上裸體名畫給賭王：「係韓國畫家，幅畫會3D，會變色，唔同角度有著衫，冇著衫，等何生做運動時從唔同角度有唔同嘢望。」

超盈表示幾兄弟姊妹送上LoroPiana溫暖牌大褸：「夠實用，爹哋鍾意實用款式同夠暖。」超盈表示大賭王一歲嘅八姑娘何婉鴻前來令賭王好開心：「八姑姐係神秘嘉賓，佢哋好耐無見，好開心。」