恒指周一爆升、今日回吐，但預計調整過後，短線喺美國宣佈縮表前後，會再度發力，理由喺兩期提過，麻煩閣下Click返舊文了。大家見識過、感受過星期一大升市嘅威力，相信只要港股重拾升勢，威力可能再增強，唔講得笑。而喺類似今日嘅跌市，最適宜就係執倉，以保持一定進攻力。

今年強勢板塊內房、科網先後進入瘋狂狀態，汽車股就略轉風向，要有新能源概念加身先炒得起，之所以比亞迪（1211）開晒turbo，睇怕仲未完。之後唔爭在商品股吧，隨時跟內房、科網車尾炒上，洛鉬（3993）守得穩10天線的話，留意會否出現可觀升浪。

其次留意行業龍頭股，燃氣股之中，中燃氣（384）連日喺22蚊阻力頂住，但呈上升三角形，以目前咁嘅市況，呢啲阻力又點會阻到龍頭股呢？應該遲早輪到開車。工業股仲有龍工（3339）準備上升旗形突破，周一升市未炒到佢，但今日跌市又未震到佢，仲可以逆市升，買需強勁。

橫跨幾個sector後，原來仲有醫藥股蠢蠢欲動，三生製藥（1530）旗形突破後挑戰13蚊高位，似乎一樣有計。

講咗咁耐二三線，講返大嘢，都仲可以留意返滙控（005），今年同騰訊（700）輪流成為升市火車頭，近期開始集氣再升，大市爆上應該點會少得佢一份。夠啦。

晉佳

蘋果財經，關心你飯碗
http://fb.com/appledailyatm