民主黨立會新星甘乃威星味欠奉，入議會後惟有將勤補拙，好多議題佢都出手，據聞唔少官員都怕俾甘威纏上，因為一纏就走唔甩。唔知係咪因為咁，令到佢開始被官員排擠，因為灣仔爆水管單嘢，佢約好水務署、運輸署、路政署同環保署四方代表噚日中午12點開特別會議，點知開會前一個鐘，水務署突然通知佢，話同佢個會要取消。

忽然約埋保皇議員

如果真係有事在身唔嚟開會都算，但各署代表原來喺同一時間約咗其他主要來自保皇陣營嘅議員，包括民建聯葉國謙、鼠王芬同劉秀成等一齊開會，仲話甘威都可以嚟，似乎係唔想俾甘威獨食咁得戚。甘威提起呢件事就火都嚟埋，幾乎要報警，告其他人「搶嘢」，覺得明明係自己約嘅會，冇理由變成大茶飯，益埋保皇黨免費享用，大鬧政府肯定係唔想佢攞威。
甘威會去信水務署署長馬利德同發展局局長林鄭月娥，投訴佢哋阻礙自己履行公職，民主黨黨團稍後都會討論。八方聽聞唔少其他黨派議員都對甘威經常搶威有微言，所以水務署噚日朝急call下，幾忙都要去戥腳，旨在唔畀甘威一個人威晒。