俄羅斯索模艾琳娜上個月同葡萄牙球星男友基斯坦奴朗拿度（C朗）成家去完渡假後，呢排開番工，去幫泳衣品牌影相；性感泳衣配美人，輯相就當然火辣辣，索到爆！但艾琳娜下份job更值得期待，佢會幫內衣公司影相呀！唔使靠想像，我求大俠率先披露，畀張艾琳娜着住黑色lacebra嘅靚相大家睇吓先。嘩！結論得一個，真係好葡萄C朗。
同艾琳娜sweet咗成個月暑假，C朗都玩夠唞夠，上星期已經跟皇馬會合，飛咗去美國加州集訓，準備嚟緊嘅熱身賽。睇番美國之旅嘅名單，唔止C朗，隊長卡斯拿斯、奧斯爾同沙比阿朗素呢啲踢完歐國盃嘅球員已經歸隊，就連盛傳走人嘅卡卡同紐尼沙軒都喺度，唔計踢奧運嘅馬些路，都差唔多夫添，係差中堅卡維奴啫，睇嚟佢都走硬。

喺周二嘅操練入面，班皇馬球員都表現得好輕鬆，其中C朗睇落幾弗，冇咩點肥到，仲揪起條褲騷大髀肌肉，以激凸效果回應女友輯靚相乎？至於場外活動，除咗要同美國嘅球迷見面，皇馬仲學打棒球，之後又同巴西摔跤手華頓（FabricioWerdum）過番兩招。
皇馬上仗作客里斯本，同賓菲加爭尤西比奧盃；喺防線不整之下，輸2:5。佢哋今次會喺美國踢4場熱身賽，香港時間今朝10點半會對有碧咸效力嘅洛杉磯銀河；原來皇馬已經連續3年搵銀河踢友賽，都係皇馬贏晒，之後仲會對祖雲達斯、AC米蘭同些路迪。