由「仁美清叙」主辦《大話西遊III》慈善首映喺奧海城二期舉行，鍾欣潼(阿嬌)、林作同林媽媽、黎燕珊同囡囡、朱慧敏、黃倩婷、陳家樂等等。

阿嬌話自己有份喺戲入面客串過兩日，不過今晚要為嚟緊24號嘅上海演唱會綵排，所以唔可以入場睇，而且今年11月底仲有一場巡迴演唱會。問佢近排係咪好忙？阿嬌話：「係呀，忙啲好，自己都係啱啱巡迴演唱會返嚟香港兩日，所以都比較攰。」

問到張致恆(Steven)近排嘅感情事，阿嬌即刻話：「冇留意喎，乜佢哋唔係分咗手咩？我同Steven唔係太熟。」

同場嘅黃倩婷表受訪問時，佢自己同莊端兒平時有一齊做gym。咁有冇問候下莊端兒？黃倩婷話：「o依家新聞出嚟冇耐，都應該俾空間佢，遲啲再問佢。」佢仲話莊端兒喺佢面前都冇呻過；佢自己本身都唔識Steven，係工作上見過面。
對於Steven偷食，黃倩婷話：「人哋感情嘅事就由人哋回應啦。」

若果你男友咁做會點？當然會唔開心，冇得原諒，不過佢自己點決定就由佢處理

同場嘅陳家樂接受訪問時，表示佢同Steven幾熟，入行以嚟同佢都係好朋友嚟嘅。佢又話：「呢兩年Steven做人處事都有進步到，同埋見佢今次鏡頭前回應有承擔，勇於認錯，有進步，希望俾多啲時間佢。」

Steven話自己要睇醫生喎，咁陳家樂有冇相熟醫生介紹俾佢？陳家樂笑笑口咁話：「我都唔知呀，我反而要問下佢係咪真係有需要睇醫生。我覺得佢要搵多啲朋友傾下偈。」陳家樂又話佢今次搵錯朋友傾，搵咗女仔，睇嚟佢真係要戒一排女色喇，專注下事業先啦。