上海前首富周正毅的太太毛玉萍，06年因造市被判入獄，08年獲假釋後富泰依然，繼續住靚屋、坐名車，她與前夫所生的兒子Eric更集萬千寵愛於一身，獲母親揼水撐腰。前日Eric和一身街坊裝的女友唐貝詩出巡跑馬地買雜誌，短短8分鐘拍拖更，Eric不只出動母親名下的40萬座駕接載，全程更有大隻保鑣人盯人跟到實。原來時下富二代拍拖，好貴氣！

前日下午近5時，Eric和一身街坊look、踢拖及戴黑超的唐貝詩乘坐掛上靚車牌「M0M05」、毛玉萍和周正毅公司名下的40萬豐田七人車抵達跑馬地成和道，兩人落車時，坐於車內保護兩人的大隻保鑣隨即衝落車開路，Eric拖女友過馬路，保鑣如影隨形殿後。

接着Eric和唐貝詩走到書報攤揀書，保鑣又從後睇實。最後Eric掃了幾本影音AV產品雜誌，並將雜誌一手「質」向保鑣，由他代勞，繼而才跟唐貝詩拖手上車。其實二人上落車買雜誌只花了短短8分鐘，但大隻保鑣全程傍實高度戒備，可見毛玉萍對Eric這個心肝椗何等緊張。