香港電影史上最賣座韓片《屍殺列車》上映咗就快三個星期，票房依然好犀利，話咁快票房已經過咗5千萬港元，認真犀利。

唔少本地影迷都已經一早撲飛睇戲，不過依然有大批影迷未睇，估計票房亦陸續有得升。《屍殺列車》無論喺韓國、台灣、新加坡等地上映時都掀起話題，仲好成功做咗當地票房冠軍，都咪話唔犀利。

由於《屍殺列車》咁受歡迎，但佢喺大陸就似乎上映無期，暫時都未收到消息電影會喺大陸上映，但早前已有網民喺微博做直播，等大陸網民可以睇到呢部電影，之不過當時網民直播時就只得原裝韓文版，就冇字幕版，搞到影迷都睇唔明。

雖然《屍殺列車》喺各地繼續上映緊，但有網民以身試法，偷偷將高清版《屍殺列車》放上網供下載，當中分別有線上睇(只得英文字幕)，或者下載中文字幕版。

雖然呢啲網民好大愛，明益其他網民，不過電影仍然播緊，加上呢啲行為擺明無視法紀兼侵權，所以無論係上載定係下載緊嘅網民都係犯法，講真，想感受《屍殺列車》嘅緊湊過程，梗係畀錢入戲院睇先過癮。