同英超一樣，香港馬季都有聖誕檔期，明日（23日）同下星期三（27日）都有馬跑。即使佳節當前，好多騎師都唔敢亂食嘢，等到跑完馬後先開X’mas派對慶祝。據聞，貝湯美會廣邀祈普敦等好友，一齊去佢屋企慶祝聖誕。

大家普天同慶之餘，於佳節做善事就更有意義。早前提過巴度超索女友Eva係一名演員，佢上星期就發揮自己專長，參與一個慈善項目，為項目拍硬照做宣傳，相片由以香港為工作基地的俄籍攝影師Tiana Kotti操刀。

Eva當時穿上黑色低胸晚裝，加上一把長長秀髮，打側身擺甫士，展示最強body，的確吸引眼球。巴度睇完張相，大讚格調高雅，兼且影到自己條女好靚。

賽馬方面，巴度今期（23日）有七匹座騎，當中佢較睇好頭場「港林福星」。巴度指此駒前仗爆冷贏谷草2200米，雖然只係五班賽事，但本身是四歲長途馬，開竅後有機會持續進步，在四班負114磅跑，未必唔可以殺出重圍。