日本朝日電視台昨晚播出四小時直播騷《Music Station Super Live 2018》，安排不少歌唱單位輪流表演，包括乃木坂46、櫸坂46、AKB48、西野加奈、aimyon、菅田將暉、EXILE、柚子等，嵐則壓軸登場。

情歌天后西野加奈為應節，特別穿上聖誕樹長裙獻唱名曲《戀愛使用說明》，而「一曲走天涯」嘅騎呢組合金爆，又係例牌唱出代表作《女性化》，不過今次就搞搞新意思，邀得轉型成大隻佬嘅一代妖男武田真治齊齊剝衫，46歲嘅武田真治今年主持NHK健身節目《大家一齊做肌肉體操》人氣反升，佢先吹住色士風為金爆伴奏，之後在台上變身爆肌造型，捧住色士風帶領金爆邊唱邊做運動，場面搞笑。

至於櫸坂46主將平手友梨奈因健康問題而再度停工，現時平手需專注治療，無法再於台上表演，將缺席《紅白歌唱大賽》等年底盛會，由於平手昨日未能出場，換來鈴木美愉代替平手擔任Center位置。

精選娛聞，喺晒《娛果》
http://fb.com/appledailyent