打開報章分類廣告，不難找到「假結婚」門路，廣告開宗明義說有透過進行中港婚姻搵快錢途徑，適合20至70歲，男女均可。女記者昨隨意按廣告資料，致電自稱中介人的樂小姐，開門見山問價：「係咪有路？幾多錢？」操流利廣東話的樂小姐反問記者：「你結過婚未？幾多歲？有冇身份證同回鄉證？」
記者自稱行年30，未婚；樂隨即硬銷說：「我哋做開海南島線，啱晒你個年紀，價錢3萬6，分三期畀你，簽完紙，先攞萬6，一年半後公安覆檢完，再攞1萬，最快三年半男人攞到單程證，之後離婚攞埋尾數1萬。我哋會包機票、寡佬證（單身證明）同法律文件，唔使過夜，早去晚返。」

保證唔使「嚟真」

樂小姐見記者猶豫，即大派定心丸：「你放心啦，我哋喺呢行做咗十年，內地結婚最安全，香港結好易俾入境處跟到；上次拉嗰個衰貪心，喺內地結完，又喺香港再結，諗住賺多筆。噚日我先至帶咗九個香港妹上去，如帶旅行團咁！」
記者不放心地問：「使唔使同個男人『嚟真㗎』（發生性行為）？」樂保證不會假戲真做之餘說：「不過咁，我見過有三個香港妹同『假新郎』發生真感情。」樂不斷落力「𠱁」記者相約見面，記者推說要考慮，隨即收線。
本報記者