九西補選民主派再次敗北，令人擔心嚟緊將會出現嘅新東補選喺DQ陰霾下，民主派會唔會一輸再輸？經常喺網上發表驚人言論嘅城邦派國師陳雲今日接受港台訪問時提出新想法，建議民主派採取「控制之下嘅焦土政策」，由民主黨創黨主席李柱銘以自決立場報名參選新東補選，若然特區政府選擇DQ就會有國際輿論、唔DQ又即係放生自決，即係無論如何都會搞到一身蟻。

陳雲話，焦土論其實唔係叫人唔投票，而係要喺選舉中採取聰明啲嘅鬥爭策略，佢建議喺未來新東補選由李柱銘以自決立場報名參選，「如果政府夠膽DQ呢，對外國嚟講就會（認為）好多民主派議員都唔能夠參選」，形容係「控制之下嘅焦土論」，相信會令特區政府一身蟻。佢又提出再進一步可以由公民黨黨魁同民主黨主席，一同以自決主張參選，最終「成個黨唔玩」，或者整個泛民都撤出議會。

聽到呢到，大家可能諗到，結果可能會令到民主派失去議會話語權？陳雲就覺得，其實同宜家分別唔大啦，有爭議性嘅撥款咪又可以通過，但效果卻會令外國知道香港已經無咗民選議席，國際社會就會知道香港自治削弱，美國政府等就會向中國施加壓力，令中國唔可以再用DQ或者各種方式，干預香港選舉同其他運作。

同場嘅香港眾志秘書長黃之鋒唔同意陳雲講法，舉例話新加坡反對派都試過全面撤出議會，或者澳門立法會民主派嘅議席較少，都唔見得國際社會有特別嘅關注囉。

但國師之後又話鋒一轉，話全面撤出議會其實未必會成真，事關政府或者中共都習慣咗反對派存在，中共係唔習慣無咗民主選舉嘅幻像，話自己提出嘅焦土係「我係預咗畀你（政府）燒，但你（政府）係唔夠膽燒我」，真係估你唔到。究竟國師係真心為民主派獻計，定係講屎橋跣民主派？陳雲之後補充自己係本土派，即使自己「知道點玩法」，但整體策略都唔會幫民主派諗喎，所以信唔信國師妙計，民主派就自己諗喇！