【新增內容】
57歲劉德華噚晚紅館開騷期間，佢突然向全場觀眾宣佈腰斬演出，演唱會製作單位映藝文化娛樂有限公司今早向傳媒發出通知，佢指出華仔喉嚨發炎無法演出，所以由噚晚開始到聽晚都暫停演出共三場，稍後才決定大除夕嘅演唱會係咪可以如期重開，華仔嘅演唱會原定舉行20場，由本月15號開始，至到明年1月3日。

華仔噚晚「聲沙」中途腰斬個唱，佢台上向歌迷道歉時都流淚不捨，台下歌迷睇到好心痛。華仔閉關休息，今日有傳媒喺佢加多利山寓所外守候，門外未有加強保安，但發現有一名疑似便衣警員門口徘徊，仲拍下記者照片，現場有兩架傳媒採訪車等候。大約11點幾，有一名交通警員騎住「鐵馬」駛到門前，佢勸喻記者離開。

另外，大約1點鐘左右，由於再有傳媒到華仔寓所外守候，保安亦再一次報警，警員到場抄低各人身份證，要求記者離開。

精選娛聞，喺晒《娛果》
http://fb.com/appledailyent