【新增內容】

曾經，「處女黨」喺無綫，曾經，寫下光輝一頁。你諗下，有李亞男、王君馨、苟芸慧、鍾嘉欣同岑麗香。又再諗下，咦，連苟姑娘都要嫁喇，處女黨變索爆人妻團喇。唔緊要吖，就算係人妻，都仲係好索，你睇，做咗強嫂嘅香香，幾正！《果欄中的江湖大嫂》同《溏心風暴3》，甚至套劇「慘不忍睹」嘅《為食神探》，都係睇香香之嘛。

但今日有傳媒報道指，就連香香都唔續約無綫喇！即係，成個處女黨／索爆人妻團，得番一個王君馨仲可以喺大台見到。

消息指，33歲嘅香香，2010年國際中華小姐兼09年溫哥華華裔小姐冠軍，效力無綫多年，由配角捱到二線頭一線尾，突然決定唔再續約，係同劉家豪新劇有關。報道指本來個劇定咗香香係主角拍住王浩信，點知突然易角，變成唐詩詠！

有指就係因為咁，令香香心淡，決定唔續約。份約到期日，係今個月中，即依家…亦有消息指，香香拒再續約，係想生BB。追問一班姊妹香香係咪有咗？大家都好口密，苟芸慧回覆《蘋果》話：「I am actually at le mans in France, with the racing team. Not so sure of that. Its better to leave it to eliza to answer it herself.」（我跟賽車團隊正在法國，對於這件事情我也不太知道，最好還是留給她回應吧。）不肯正面回應。而李亞男就話：「我唔清楚合約啲嘢。可以問Eliza或Tvb」，至於王君馨則表示：「呢啲嘢俾佢自己回應好啲。」

不過，據了解，香香其實幾個月前已經推咗劉家豪部劇唔拍，一心諗住今個月約滿無綫唔續約，專心調理身體生BB，所以唔係不滿新劇被換角，據知，香香目前仲未有BB，佢只係準備佢造人大計。而無綫藝員部知道香香辭演之後，先至搵唐詩詠接演，所以今次係唐詩詠執香香二攤先至啱。

精選娛聞，喺晒《娛果》
http://fb.com/appledailyent