教協搵咗新人任總幹事做大內總管，佢就係12年前做過學聯秘書長、即係現任秘書長周永康前輩，即將36歲嘅馮家強。
馮家強02年搞社運時，被控舉行未經批准集結及協助舉行未經批准集結罪成，留有案底，係首批《公安惡法》嘅「犧牲者」。
咁又如何？佢當年就由綠色和平項目主任做起，一直做到東亞分部與區域發展總監及國際總部總幹事辦公室主任；07年開始轉做行政工作，所以唔使擔心佢管唔掂有200名職員嘅教協喎。

會長揀人好小心

查實教協請總幹事請咗兩年幾，一直請唔到合心水嘅人，會長馮偉華話有30人申請過，為防被滲透，好小心揀人。
馮偉華話，「有啲人內心係『藍』啲，多數只引述網頁資料，扮同我哋志同道合」。
適逢馮家強近一兩年想返香港志願機構工作，教協就搵咗佢，結果一拍即合。
馮家強噚日同傳媒茶敍時話呀，舊年7月起，佢啱啱調咗去荷蘭綠色和平總部，好在可以趕及喺銅鑼灣佔領區清場嗰日返嚟見證。
作為學聯老鬼，佢建議學生領袖多啲留意宏觀政治環境，同埋國際及北京對佢哋點睇，仲話𠵱家香港政府對學生打壓比12年前尤甚，社會嘅習以為常令佢好擔心。