31歲落選港姐李美慧大後日將升呢幸福人妻，下月3日嫁已故富豪曾紀華二房長子、56歲富商曾文豪，兩人拍拖半年，女方仲係雙喜臨門，一對新人選在淺水灣舉行婚禮，之後再去法國開派對。

曾文豪與前妻育有兩女，大女曾昭怡，二女曾昭亮。李美慧比曾文豪大女細一年，卻與二女曾昭亮同年，兩位繼女同李美慧好傾得埋，亦都好戥父親再婚開心。曾昭怡仲話打算送舊B衫畀即將出世嘅同父異母細佬或妹妹，貫徹環保原則。

距離大婚日子進入倒數狀態，李美慧前日就陪準老公曾文豪去銅鑼灣一間salon剪個靚髮，兩人跟住拍拖行希慎，買埋婚禮用品。曾文豪剪完靚髮，加上人逢喜事，心情靚靚，佢拖實未婚妻李美慧喺商場連走五站，買到對手都拎唔到，佢哋先肯返歸。

準新娘李美慧淡妝出巡，身穿白色連身裙，暫未見肚，足踏厚底涼鞋，非常安全，加上有暖男曾文豪拖實，全程貼心照顧。一對準新人雖未註冊，但李美慧嘅左手無名指已戴上4卡閃爆鑽戒，十分搶眼。

今次Shopping，曾文豪自己有收穫，貼心帶有喜嘅李美慧買過新嘅便服鞋，方便出入。離開salon，第一站去咗買鞋，兩人齊齊試新鞋，有商有量交換意見，最後一人一對新鞋。

買完鞋就去買新衫，曾文豪耐心陪未來老婆置裝，李美慧試咗四、五套，收穫豐富。搵到心愛嘅戰利品，李美慧索性著住走，白裙變黑裙。至於第三站，就輪到曾文豪去揀男裝底褲，唔知係咪新婚關係，由內到外都要全新。

連行三店，買到攰晒，佢哋去咗一間床褥店，店員熱心過來介紹。李美慧可能懷孕易攰，佢索性坐低休息，手袋都放低埋。至於曾文豪呢？索性瞓底試床褥試體感。

跟住佢哋又去咗蘋果店整手機，最後一站係去附近奇華買咗一袋中式禮餅——應該唔會依家先嚟買嫁喜禮餅嘛。

《蘋果》前晚聯絡李美慧，佢以短訊回覆：「今日剛好得閒，明天就冇時間了。」問到李美慧點解唔一齊剪髮，佢話：「我不剪，今日陪他，因為婚禮近，要整靚仔啲。」佢哋拍拖行街買咗好多嘢喎，又睇新床褥，係咪擔心大肚對腰骨負荷，所以想換新床褥，李美慧答：「嗯。」

精選娛聞，喺晒《娛果》
http://fb.com/appledailyent