大陸人落香港搏命使錢，香港人就上大陸搏命搵錢。平安保險（2318）副總裁梁家駒可能係最為港爭光嘅打工仔！上海榮正投資諮詢新發佈的調查顯示，土生土長嘅「香港仔」駒哥舊年以年薪2859.21萬人仔（下同），力壓一眾華洋外資，成為內地「09年上市公司打工皇帝」！雖然同香港個幾位皇帝比，3000萬都未算得係乜，但響祖國嚟講，真係唔嘢少o架！
呢個調查機構以從事製造業嘅ST大水高級管理層薪酬，同駒哥份糧做比較，人哋公司高層最貴嘅打工仔，年薪只得2.16萬蚊，除開月薪得嗰1800蚊，同駒哥份糧嘅差距，簡直係「冰火兩重天」……唔怪之得我哋嘅張宇人議員咁夠薑話，香港人最低時薪應該係20蚊喇！
之不過咁，呢個數字雖然話係新天價，但只係稅前嘅，計埋交稅，駒哥實收1591.64萬。咁駒哥收咁多，一手將駒哥由保誠撬過嚟嘅「伯樂」、平保掌門人馬明哲呢？一直係打工皇帝嘅馬總，放棄咗08年嘅「零年薪」，扣埋稅後09年實收289.94萬……夠膽講句，走落中環，是但搵一個都貴過佢囉！

榮太子筍價買地　中信利益輸送？

炒賣外滙期權Ikillulater（Accumulator是也）、搞到巨額虧損而killhimselflater嘅中信泰富（267）前主席榮智健，最近被爆用超低價買入海南地皮，再度惹起中信泰富同榮太子關連交易嘅揣測，噚日喺中信銀行國際定名儀式上，作為阿媽嘅中信集團董事長孔丹自然要解畫，到底中信泰富係咪同榮太子玩利益輸送呢？
見慣大場面嘅孔董不慌不忙咁話，中信泰富乃係上市公司，呢啲傳聞應該交番畀佢哋嘅管理層回應。
之不過咁，中信集團作為大股東，會要求管理層及董事會，秉持公正原則辦事，佢對中信泰富管理層好有信心，佢哋已委派代表好似常振明等高層，加入中信泰富。
榮太子當日kill咗唔少中信小股東，邊個同佢哋講公平、講原則先？希望孔董快啲話俾大家知，係咪豪咗塊地俾太子仲好喇！

李華華
mailto:[email protected]