上星期八方先講過，滙豐用咗3千萬人仔，復修武漢洪湖濕地，鄭海泉仲專登北上視察，前幾日佢哋又再出手，搞咗個「2005滙豐銀行慈善基金優秀教練選舉頒獎禮」，過去十年基金先後撥咗1,600萬贊助，雖則條數同國內差一截，但總算惠及本地薑，好過冇啦！
個頒獎禮係滙豐搞嘅，咁頒獎嘉賓就梗係搵番自己人啦，邊個？咪就係孖住英皇一姐容祖兒剪綵、傍實煲呔食晏，曝光率爆晒燈嘅王冬勝囉，個選舉有5個項目63個獎，「全年最佳教練獎」呢個大獎，就落咗黃德森個袋，黃太珊珊仲帶埋寶貝女現身撐場，影合照時，黃德森抱住個女，同老婆親親密密，企喺側邊嘅冬冬同李家祥就離行離列，一睇就知邊個係自己人，邊個係外人。

傳真︰2623-9278
電郵︰[email protected]