被人迫遷
相對Amanda的緊張,原本在香港有份穩定工作的Racheal就淡定得多。「有日從收音機聽到有個比賽,要講出若有錢去澳洲,會有甚麼夢想,點知畀我贏咗,有免費機票同兩日住宿,於是就飛咗嚟悉尼。」或者得來太易,她的計劃要比Amanda更糟。「無㗎!諗住嚟到呢度見一步行一步,結果就出事。」可是,找不到工作不是Racheal的最大挫折。
「最唔開心嗰陣就係俾人迫遷,搞到無家可歸,要周圍借宿。嗰陣真係開始識得驚。」幸好Racheal勝在樂天,兼且到埗不久已廣結好友,被hostel迫遷的她幸得朋友接濟。
在悉尼的第一個星期,兩個女生甚麼觀光的心情也沒有,只有忙着找工作。「其實,𠵱家諗番嗰陣又係太驚青,喺呢度識嘅外國Backpacker好鬼型㗎,冇工又唔驚,冇衫着又唔怕,就算一日半日瞓街都冇所謂,相比之下我哋顯得好冇鬼用。」體驗嘛!初到貴境,人生路不熟,有點不知所措又有甚麼可恥呢?(悉尼Twins四之一)
記者:李莉 攝影:陳智良