雖然欠債還錢天公地道，但當好朋友問你借錢之後，想叫佢還，無論你幾咁理直氣壯，開口嗰刻總係有啲語塞，除非你唔想keep住份友情！

冇啦啦講呢啲嘢，原因係敏妮咁大個女，噚日第一次叫人還債。其實，作為一個精明嘅人，有好多嘢係一開始就唔應該做──排首位嘅係借錢畀人，唔熟嘅固然無謂借，點知會唔會一去冇回頭；熟嘅就更加唔應該借，因為好容易傷感情。試諗諗，有骨氣嘅熟朋友，唔到最後嗰步都唔會開聲問你借，既然已經走投無路，就算佢還畀你，睇怕都要等一段日子。至於冇骨氣嘅朋友，就更加唔使講。
7、8年前敏妮入世未深，借咗錢畀一個有骨氣嘅熟朋友，當提出還錢要求時，佢都冇抵賴扮冇件事，要知道喺呢7、8年嚟，敏妮都冇正式提出還款要求，加上當年大家憑一個信字，冇任何憑據，所以佢真係可以扮失憶。
不過，正如上面所講，有骨氣嘅人問得你借錢，本身真係好唔掂，所以佢冇辦法即時還債，但都提出咗兩個可行方案：畀啲時間佢籌錢，或者分期還。
股王A知道後話：「你哋仲做唔做得成朋友，家陣都未揭盅。」原來股王A有個借錢畀朋友嘅不愉快經歷。話說10年前佢朋友換樓，由於賣舊樓嘅錢未回籠，但新樓又要畀錢，所以搵佢借錢短期周轉。

不過兩個星期之後，呢個朋友突然音訊全無，股王A打電話畀佢了解乜事，「起初佢還返部份畀我，又話個女喺英國讀緊書，錢銀好緊張，等個女畢業返香港就會一次過還晒。」冇耐，呢個朋友又再次冇晒聲氣，股王A再追，嗰位朋友再還啲，但始終唔肯還清。
股王A相信佢呢位朋友並唔係冇錢，因為據聞佢有錢炒股賭波，「最後佢仲欠我1萬蚊，雖然有辦法搵到佢，但我準備循法律途徑追討，嗰啲錢我當輸咗，咪當用1萬蚊睇清一個朋友嘅真面目囉！」
借得錢畀人就要做定攞唔番嘅心理準備，但慷慨同義氣唔可以相提並論。友誼無價，當一段友誼貶值到只剩1萬蚊，輸嘅又點止係賬面實際價值。
http://manlitalk.com/blogs/