韓國性感歌姬李孝利孖音樂人老公李尚順，及「國民妹妹」IU出演嘅JTBC真人騷《孝利的民宿》噚日播出最後一集，佢哋迎來民宿營業嘅最後一日，三人互相為對方畫畫像，睇到畫像後即時笑唔停。

三人為最後一名客人辦理完退房手續時，就閒坐一邊，IU對於最後一天營業表現得勁唔捨得，李尚順就問IU係唔係唔想返屋企，IU即時點頭，不過李尚順就叫IU都係返屋企比較好，事關喺屋企會比較舒服，佢亦都唔使再洗碗。

面對即將離別，三人既不捨又唔適應，IU仲寫咗一封信畀李孝利夫婦，李孝利讀完信後即時眼濕濕，李尚順就問老婆係唔係喊，因為大家約定咗唔喊，李孝利就死撐話自己冇喊，只係覺得疲累，同時又讚IU封信寫得好好。