福特汽車上月在美國本土的銷量大跌，雖然仍稍勝豐田，但其美國市場「二哥」地位，今年勢被過江龍取代。唔少股民都好疑惑，到底正積極求變、重組救亡嘅福特，股票𠵱家買唔買得過。
網民guk6kk喺《SuperiorInvestor》討論區留言問：「福特搞重組係咪有利長線投資？另有指，其股價被市場低估，係咪意味家陣係吸納好時機？」Rickster話：「如果要短炒，福特一定唔使諗，長揸等股價升，又要同佢鬥長命，點計都博唔過。」

PE低或因需求減

masayako認為，「市盈率（PE）低唔一定代表股價被低估，亦可以演繹成市場對股票需求減少。」Mr.Gekko亦話：「買福特股票不如買佢嘅債券收息﹗」
另一邊廂，股民emetahI喺《MSN》討論區亦有類似嘅問題，佢話見福特股價𠵱家7個幾美元，都心思思想入市買番啲。但網友runewell聞言就大潑冷水，「連福特自己都預期2009年之前未必可轉虧為盈，咁仲有咩原因要買佢嘅股票先？」
brock0就話：「福特求變的確有機會扭轉形勢，但關鍵係幾時先見效。」雖然有專家都幾睇好呢類股份，認為博得過嘅原因係冇投資者敢買，變相令其價值被低估，但佢曾經買入類似嘅股票，結果蝕到差啲渣都冇，以後見過鬼都怕黑，從此都唔敢再沾手；又話如果真係要買汽車股，不如趁豐田股價回落時趁低吸納，話晒佢都係美國汽車業嘅宿敵，實力毋庸置疑，但佢認為汽車股短炒點都好過長揸，因為呢行要經常投資新車款先有叫座力，股東有排先可以分享成果。
不過，喺「07預言」嘅討論中，網友returnbuster睇好福特，仲話今年有望突破8蚊美金㖭。USMCret話福特要贏人，就先要贏自己，如果再唔快啲推新車款，股價想突圍就真係天方夜譚。