內地河蟹橫行，六四前後更加活躍，用戶極多嘅新浪微博呢幾日好熱鬧，因為好多人用各式各樣方法留言悼念六四，令河蟹疲於奔命。
噚日最多人激讚留言係TVB記者柳俊江喺微博貼出嘅一篇短文：「平日午餐我喜歡吃海南雞飯，我家附近有一家，味道不濃。夏天到了，不知怎麼的反而最近水準下降了，迫得我找別的，剛發現有一間西餐。香港的豉油西餐較貴，六十元一個套餐，但真的實在令人回味，凍奶茶也很好喝。假日很累，拿出一百，四十元拿回來，買個甜品，下午好好睡，今天晚上會很漫長。」

女主播寫首牛扒歌

驟眼睇呢篇文，真係有啲無厘頭，唔易察覺有甚麼古怪，不過好多微博友卻大讚「柳爺好文采」，有人聲稱：「柳生說的西餐廳我也有去過！奈何它在晚上8、9點左右真的很full，不會找到位子，生意好但店子小，只有64個位！我們全公司共有21人，公司來個聚餐已佔了人家小店的3分之1位置了啊…」
講得白啲，大家終於明嘞，原來柳俊江玩嘢，將「平反六四」四個字隱藏在短文中，只要巧妙排列就可以睇到。由於柳俊江實在太蠱惑，連河蟹都察覺唔到，令呢篇「平反六四」妙文可以留在網上，冇被刪除。
有線女主播王沛然亦好應景寫咗首牛扒歌：「平底鑊上煎一煎，反轉再將喼汁添。六成半熟剛剛好，四十幾蚊抵到癲。」呢首頌讚牛扒嘅順口溜，首四字亦係「平反六四」，可能河蟹唔食牛扒，亦過到關。

內地網民挑戰河蟹

無綫同有線記者網上悼六四，亞視兩位主播胡天衡同陳佩琳都有表態，噚晚六點鐘新聞着黑衫上鏡，新老闆王征唔知點睇？內地會cut敏感新聞，呢個畫面，唔知內地同胞收唔收到。內地網民出盡辦法挑戰河蟹，有人咁寫：「我是89年那屆高考的，那年我和很多學生都哭了，因為我的試卷實在難得過份，令很多無辜學生都犧牲了，往後只能不斷要求重考。」

mailto:[email protected]