內會討論熱血公民鄭松泰提出，用特權法查沙中線工程問題。民主派當然贊成，建制派亦例牌反對，本來大家各抒己見，總算相安無事，點知兩邊越鬧越激，議會陣線毛孟靜唔知係咪想緩和吓氣氛，當佢發言反駁新民黨容海恩嘅時候，叫咗容海恩一聲「女女」，結果反而更加火上加油。

是咁的，建制派猛話民主派用特權法調查係政治化，毛孟靜就用番容海恩嘅金句，議會內外不宜牽涉太多政治，當時毛姨姨就不點名稱呼容海恩做「女女」。容海恩都未出聲，新民黨主席葉劉淑儀就要求毛澄清，佢講緊邊個係「女女」。

毛姨姨直接了當話係容海恩咯，仲自爆有時撞到都係咁稱呼容海恩，容海恩自己都知㗎﹗「媽媽」都出咗聲，容海恩咪惟有跟咯，佢都要求毛澄清話，「女女」有幾個意思嘅，毛孟靜指咩先？有套戲都叫《囡囡》啦﹗葉劉再幫口話，有啲係媽咪、有啲係囡囡，議員唔應該用啲貶損嘅字眼稱呼其他議員。

毛姨姨真係冇佢哋咁好氣，一聲「哈哈」就算。八方就記得有個詞語叫做：對號入座。