上星期分別有升中派位放榜同中學文憑試放榜，預告網誌會有新風格嘅勞工及福利局局長羅致光（CK），噚日終於顯示新風，唔似一般局長喺網誌寫硬性新聞，實行軟銷貼舊相同大家想當年，藉住早前DSE放榜日透過電郵向母校英皇書院嘅應屆考生送上鼓勵做引子，話喺電視訪問片段中見到唔少同學仔話唔捨得老友記要各奔前程，亦勾起佢同唔少同學失去聯絡嘅感觸。
CK於1966年畢業於堅尼地城呂明才紀念小學，佢憶述當年同班同學中，不足三分一人屋企有電話，唔似得𠵱家隨時可以用WhatsApp溝通交流，因此升中冇幾耐，大家就失去咗聯絡。

全班50人 現尋回8人

原來CK早幾個月曾經試圖聯絡呢班半世紀前嘅舊同學，但發現全班50人中，只有15人當年地址簿上嘅樓宇仍然存在。透過舊地址、電子網絡同社交網絡，最終佢只搵得番8個同學仔，所以特別奉勸升中嘅同學，要珍惜童年時代嘅友誼，否則失去咗就真係好難搵得番。
唔經唔覺，新班子上任已經超過兩星期，CK估計傳媒下一輪感興趣嘅「放榜」，相信係副局長同政治助理嘅人選，佢話希望可以早日「齊腳」，分擔佢工作咁話。

李八方