當年今日
關於我們

槍手大股東趕去倫敦 雲爺爺去定留?

蘋果日報 2017/05/19 03:00

英超阿仙奴續約雲格高安基

雲格今夏同阿仙奴約滿,但一直未講續唔續約。不過,相信好快會有答案,因為阿仙奴嘅大股東將會飛去倫敦同雲格見面,估計係講續約問題。
英國《太陽報》話,69歲美國商人高安基會喺英足盃決賽前到倫敦,同雲格傾吓前途。之前有報道話,阿仙奴已經向雲格開出兩年合約,但雲格一直未簽。今季「反雲」勢力日益壯大,愈嚟愈多槍迷要求雲格下台,「反雲黨」試過遊行,試過租飛機拉banner,仲試過罷看比賽。見到群情洶湧,高安基都要做吓嘢,盡快解決雲格嘅前途問題。不過,高安基視阿仙奴為賺錢機器,自從佢喺2011年夏天入主以嚟,兵工廠都未拎過英超冠軍,但就成日加票價,令球迷怨聲載道。