父親節賽日（18日）騎師以潘頓四Win最威，其實自「文藝學家」事件後，潘頓備受「關注」，反而令他做了穩健先生。

有意見謂個別媒體、馬迷怪錯及針對潘頓，但從騎者近日表現，其實你我都不應介意做醜人！

個別馬迷以往賭潘頓馬「中伏」後，便說句預了他有蠱惑來安慰自己，筆者想問點解要「預咗」？看來亦有辦法「預放」。

「大潘」近期固然強勢，「小潘」潘明輝也不簡單，剛戰又起孖，並延續在港10次出賽例有馬贏。

其實剛升格做七磅生的巫顯東，近期演出較潘明輝不相伯仲甚至更強，6月出賽29次獲7W7P，上名率近半，但一定不及小潘惹飛更有賭頭，頭馬不乏「大收成」及「獅子驄」等冷W，趁巫顯東跑罷今戰（21日）開始停賽，不妨連追兩次。

因應近日出色表現，巫顯東今期只有第五場沒有座騎，亦有好幾匹具備爭勝實力。其中第七場「精算率然」大前仗配蔣嘉琦勝出谷草1200米，今趟用巫顯東較前者還受讓多兩磅着數。

論馬靠放亦屬小巫強項，月初呂廐已有同一跑法的「萬馬奔騰」配巫顯東直領到底，今次隨時輪到「精算率然」照辦煮碗。

另外，尾場「睡德福」上仗配巫顯東贏谷草一哩，今次勝後轉葉廐初出，但新倉口仍選擇再用小巫出戰勝途，擺出求連捷決心，一於捧巫顯東尾口孖寶。