今晚港姐決賽將會誕生冠亞季軍，賽前一直被視為大熱嘅24歲「好動李若彤」伍樂怡(Kelly)，未埋牙早排已經奪得「我最喜愛佳麗」同「最佳KOL大獎」。

今晚會由頭帶到尾，順利入直路衝終點，抑或臨尾脫腳爆冷就未知，不過今朝Kelly就先喺IG玩直播，返緊電視城做總綵排途中，喺架車上邊答網民問題，邊唱Katy Perry 嘅Firework同Roar拉票。喺多謝網民同屋企人支持時，仲好似講到眼濕濕，不過話咁快，Kelly又笑番晒，仲郁身郁勢好醒神，睇個樣一啲都唔緊張咁，不過笑得太多，連佢自己都話個口有啲緊緊地。