當年今日
關於我們

初七人日全人類慶生辰

蘋果日報 2005/02/15 08:00


你問我嘅生日願望,坐車當然要坐勞斯萊斯、搭飛機要揀FirstClass,二十幾歲想增高依然好Easy。生日願望噏咗已經當得咗,咁你又有咩願望呢?
劉德華
「希望世界上每一個人也『高高興興』,『平平安安』。看過一句說話,「高高興興的出門,平平安安的回家」,我覺得這些祝福語很好,雖然不是祝你榮華富貴,卻是人生最簡單,最真,最單純的願望。也希望北京桂林車禍中的所有人,都可以盡快出院健健康康的回家。身體健康,沒有意外,沒有疾病,就已經是超級福氣了。」
陳慧琳
「祝各位身體健康,大人升職加薪生意興隆,小朋友利是錢又多過舊年,老人家身壯力健,女仔就一年青春過一年。我自己就想遇到好劇本,拍番套好戲!」
Twins
Gil:「希望屋企人、公司同事同朋友都身體健康。」
Sa:「(諗咗陣)我仍是希望世界和平無戰爭。我知你實嫌我行𠺝,但這確是我多年來,一直不能實現的願望。」

兒童組

小朋友好直接,跟爸爸媽媽口水尾講完:「身體健康,學業進步」這些例牌貨之後,就是真心話時間。
黃氏兄弟
(右)黃大哥:「(諗都唔諗)唔使返學!」
(左)黃細佬:「梗係去日本玩啦!最想去北海道浸溫泉同滑雪。」
上海許小朋友
「身體健康,快高長大。爸爸陪我玩舞獅,扮大頭佛。」
賢仔
「我要行花市!」(小記:初七冇花市行囉喎!)瞪大雙眼吊高八度興奮地:「行花市可以買火車,可以食棉花糖,重有好多嘢睇㗎!」咁快已經安排定雞年年尾花市行程,眼光真夠長遠。
美錡
「想身體健康,學業進步,快啲高過爸爸媽媽。」

成人組

訪問56位18歲以上成人,有理冇理答世界和平搭升職加薪的佔其中27位,可見如此配搭市場需求甚大。
(左起)
VL:「想同Run-DMC合照啦,利是錢多過李嘉誠。」
彤(搶答):「我要同古巨基合照!祝古巨基演場會場場爆滿好好睇!我係忠實Fans阿彤呀!認實我呀基仔!」
Ling:「(溫柔地)世界和平。」即時被朋友篤爆:「係鬼!佢想做港姐呀!快啲減肥減剩雙位數啦!」
衡仔:「我想快啲拍拖!各位有心人,請放膽行動,唔使客氣。」
Christina:「梗係發達啦!然後就可以結婚環遊世界!」
Jeffrey:「咁我就要世界和平啦!唔係邊度都唔使去呀。」
Rachael:「我要入大學讀BBA!」
Ernest:「冇病冇痛冇腦炎,失業率持續下降。」
Joyce:「利是錢可以突破$3,000大關,然後就減肥10磅做Model!」
陳先生(人稱六師弟):「老細加人工囉!(小記:你家陣好似擺年宵㗎咋喎!)啱㗎喇!加人工就點都啱㗎喇!」
劉太:「阿仔叫得做聰仔,希望佢讀書聰明啲啦!」
聰仔:「希望成績好啲,但唔好咁多功課。」
劉太:「阿仔叫得做聰仔,希望佢讀書聰明啲啦!」
聰仔:「希望成績好啲,但唔好咁多功課。」

人日預告人丁興旺

原來「人日」已經有兩千多年歷史,其實傳統的農曆年,並不只為慶祝新年那麼簡單,而是每天為不同的動物慶祝生日。當中當然以人日最受重視。時至今日,國內不同地方仍有不同的慶祝習俗,而清代時,更相信如果人日當日天氣晴朗,就預示當地人丁興旺,否則就可能有疫症發生。

廣東地區吃及第粥

過去邊度有蛋糕畀你食?傳統廣東人過人日,個個要吃及第粥(含豬肝、豬肚、豬腸粉、肉丸及雞蛋),寓意人人步步高陞高中狀元,學業進步又事業順境,有「三元及第、金科高中」的意思。另外也可以吃麵條,叫做「長壽麵」。

江南剪紙貼上頭

而江南一帶,除了要吃用七種菜(如芹菜、薺菜、菠菜、大蒜、香葱等)煮成的七菜羹湯,祛病避邪外,更加流行用五彩絲絹或者金箔,剪成人的形狀,貼在屏風上、戴在髮髻上,或者剪成花形送給朋友,可以裝飾之餘又能避邪。而於陝西一帶,人日又叫做人齊節,家家戶戶都會在土地廟前放油碗點長命燈,希望可以添丁發財。而成都人就會於人日「過小年」,要拜神祭祖外,更愛到西郊遊杜甫草堂,懷念唐代大詩人杜甫。