當年今日
關於我們

【李八方online】議員、高官、領導人 愛華為定愛美帝?

蘋果日報 2018/12/12 17:42

陸頌雄鄭泳舜梁志祥葛珮帆李八方ONLINE劉國勳陳克勤黃定光陳凱欣

多得建制派嘅教導,今時今日嘅社會就係你用乜就代表你支持啲乜,既然係咁,八方惟有睇真啲建制派用乜。最近又興講華為,建制派就一窩蜂話要買華為、撐華為,可惜睇番今日立法會入面嘅建制派議員又好、高官都好,唔少人都仲係撐美帝,最弊連國家領導人都撐美帝,點算?
工聯會陸頌雄話佢買咗部華為平板、民建聯劉國勳仲話用咗華為好多年添,好似唔錯。但係八方今日喺立法會所見,劉國勳嘅黨友黃定光、葛珮帆、鄭泳舜,仲有「突破界限」嘅建制派陳凱欣都係iPhone友喎,阿舜仲要一人兩部添,罪加一等。反而陳克勤、梁志祥就乖喇,冇用美帝產物。
特區高官又如何呢?政制局局長聶德權、同樣係民建聯嘅商經局副局長陳百里,又係iPhone友,八方問陳百里嘅時候,佢仲面有難色,話自己約咗議員開會,跟住雞咁腳走咗去。咁算點先?據政府中人講,其實大部份官員,包括娥特都係iPhone友,有啲官就純粹貪華為影相靚先額外買多部嚟用。咁唔識分莊閒,有冇搞錯?
所謂上樑不正下樑歪,特區高官都搞成咁,一定係上面出事。睇番今日全國政協副主席梁振英去廠商會活動嘅時候,居然舉起咗部iPad,咁仲成世界嘅?八方仲記得2016年10月,梁振英喺fb出po「證實」自己去咗中環IFC間Apple Store排隊買iPhone 7,到今年10月佢又喺fb出長者圖,展示秋天嘅櫻花美態,仲自己寫明張相係iPhone X影嘅添,當時已經有網友回應叫梁振英試吓用華為,唔知佢而家聽唔聽得入耳呢?
empty
陳克勤就乖喇,冇用美帝產物。王心義攝
empty
梁振英今日出席活動,居然舉起咗部蘋果iPad。易仰民攝
empty
今年10月,梁振英喺facebook出長者圖,展示秋天嘅櫻花美態,仲自己寫明張相係iPhone X影。