股神8個不死預言貫徹佢嘅投資格言，好似股市永遠都唔會抵買，同埋投資者誤以為股價下跌係壞事等。華華就認為，股神話美好嘅幻覺會令投資者錯失離場機會呢一點，最有參考價值，畢菲特用灰姑娘比喻投資者，認為股價勁升就好似灰姑娘參加舞會，連灰姑娘都知道凌晨12點前要離場，但投資者就往往賴死唔走，當時間一到，南瓜車同玻璃鞋通通打回原形，得番個南瓜同幾隻老鼠。
諗番起科網泡沫爆破，畢菲特講過從歷史上可以睇到，投資者永遠都唔識喺歷史吸取教訓。不過，畢菲特另外幾個不死預言都可以勉勵投資者。佢話喺資本主義社會，衰退無可避免，我哋更應該喺過去幾次衰退中，學習點應付𠵱家同未來嘅衰退，股神仲對CNBC個記者講，佢咁後生，有生之年起碼要經歷多六至七次經濟衰退。