曾爵士競選，得到重量級大人物挺撐！文學大師金庸開金口，支持曾蔭權爵士競選，話佢掂，做得嘢，並重點駁斥土共，叫土共彈開，話曾蔭權領有英國頒授嘅爵士勳銜，全無問題，係因為佢對社會有貢獻，並非效忠英國！
查生（金庸原名查良鏞）平時好少講嘢，開得聲，自然權威到震！查生名滿天下，佢自己亦榮獲過法國頒授嘅法國騎士名譽獎章，又有英國OBE，查生係法國騎士，曾蔭權係英國爵士，騎士撐爵士，英法文明勢力大會師，識英雄重英雄！
土共老左如北角蔡菜子眼紅嫉妒，咬牙切齒，死口咬住曾爵士嘅勳銜唔放，唔承認曾爵士有民望、有地位，佢哋好似一隻沙皮咁，係都要將煲呔嘅英國爵士勳銜咬甩，不斷製造噪音，令人厭煩，真係小農社會嘅下等識見！以老左嘅質素，屈喺北角愛國愛十世都唔會攞得到任何國際級嘅榮銜！

親自施洗祝福　送爵士上路

呢，英國劍橋大學有眼光嘞，即將隆重頒授名譽博士學位畀金庸㖭！創辦報紙，寫小說，連英國佬都寫個「服」字，十三億中國人，只係得金庸一個！
英國爵士、法國騎士、劍橋名譽博士，嘩，香港原來有咁多國際級精英人才喎！曾爵士同查騎士，喺帳面上，大家都咁高咁大（不過講到學識、輩份、智慧，就梗係始終老人家金庸爺爺高一皮喇又），睇嚟曾爵士都要安排時間，喺高票當選之後，第一件事，就係親自拜訪查騎士兼劍橋博士，舉行一個查曾高峯會，暢論天下古今，並由騎士親自施洗祝福，送爵士上路！
點解要當選之後呢？因為金庸就快去劍橋，除咗領取名譽博士之外，重會即時註冊讀多個博士學位㖭（聽講佢本來想去牛津讀，但牛津啲教授話：查生，講笑咩，你咁有學識，呢間學堂邊有資格教你呀，唔敢收佢，查生就變咗「人球」！）
查生嘅好學精神，真係令人景仰！唔知大師會唔會辛苦少少日後同爵士做吓Part-time特首府內閣資政（亦即新加坡嘅SeniorMinister）呢？


爆料熱線：29290000、27860099
報料傳真：26239278
報料電郵：[email protected]