蔣怡同陳明恩今日到灣仔會展為時裝騷擔任Model，其中蔣怡話同設計師蔡毅明(Grace)係好朋友，見到對方大住個肚都忙著籌備今次時裝騷，作為朋友一定要嚟支持，蔣怡話：「諗起自己大肚嘅時候，其實都周圍飛，一路工作到差唔多生得。」仲笑言：「因為自己唔鍾意着孕婦裝，加上個肚唔明顯，所以搭飛機都冇人幫我拎行李。」

問到蔣怡仲有冇計劃再生多個？佢話：「我諗唔會，收工喇一個就夠，我有好多嘢想做，o依家囡囡返咗學我可以去學做中式點心，希望遲啲有機會開自己餐廳，不過有朋友同我講，小朋友第時升咗小學中學更加冇時間，所以你話仲點生BB，一個我都已經咁忙。」

另外，同場嘅陳明恩就話自己係第一次著旗袍行騷，對行騷零經驗嘅佢話唔擔心會出意外：「即使跌低都係一個Style。」