現在去日本旅遊可方便得多，唔使再晨咁早揸住公司信上日本領事館排隊申請，只要閣下持有BNO或特區護照都可免簽證。
記得細個嗰陣，聽見去日本就開心，但人越大就越懶去日本，因為實在舟車勞頓。無論坐幾早機，去到東京市區嘅酒店check好in都經已係黃昏，雖然只係飛五個鐘頭，但到埗後起碼排一個鐘頭隊入境，跟住再塞兩個鐘頭起碼嘅車，就算坐機場Express火車，去到東京站都係要轉車，幾十歲人拖住個喼喺街度行嚟行去，像一個特大碼嘅超齡空姐。

以前確係好多嘢逛，但𠵱家覺得有啲悶。「TokyuHands」與「Loft」其實嚟嚟去去都係嗰啲嘢，除非有心去搵某啲特定嘢，否則好快行完。原宿、新宿、涉谷原是購物天堂，但由於香港的日本貨已越追越貼，基本上大小店舖所賣的東西同在香港見到的差不多。大部份新科技產品在香港水貨店已有出售，新穎的玩意在尖沙嘴JCShop亦找得到。原宿的購物街很有加連威老道味道，冒牌貨品亦少不過加連威老道。
新落成的六本木山靚則靚矣，但精品店內的精品並不太精兼且貴，個人覺得在曼谷的精品店更價廉物美。相信日本人本身都要好鍾意買嘢先可以養活咁多間大型連鎖百貨公司，最喜歡的是新宿的伊勢丹，因為有特設攤位專賣特大或特長的品牌衣服，算係照顧到我呢「亭」人。「咩話？你好好身材，所以喺日本大把嘢shop？」咁冇嘢嘞，係我唔啱，你啱晒，你架勢！