田少好嘢！自從23條一役為民請命陣前倒戈之後，八方已經對田北俊另眼相看。跟住呢位富貴大少爺放下身段參加直選，由山頂白加道落到去新界東同長毛辯論，八方在台下都為佢鼓掌（雖然佢俾長毛質佢食蕉）。到最近，田少嘅表現更加優秀，就算做唔到政治家，都一定做得成大丈夫。
第一樣難得嘅係大義滅親。
係人都知，特區政府想推銷售稅，主其事者就係唐英年。唐唐未去做官之時，都係自由黨核心成員，同田少十分老友，成日一齊飲紅酒。但係田少大是大非關口前毫不含糊，老友都冇人情講。前晚搞嗰壇截聽馬拉松搞到半夜兩三點，返屋企瞓幾粒鐘，大少爺又再出動，晨咁早親率自由黨兄弟，帶領成萬人上街示威反對惡稅。浩浩蕩蕩，正氣凜然！

第二樣令人佩服嘅，係敢言同有勇氣。
政府為通過截聽條例，無所不用其極。佢哋驚唔夠票，於是派出AO狗仔隊（呢班AO他日轉行，可以考慮加入娛樂新聞界）進駐立法會，每逢親政府議員出入都查問佢哋去邊同幾時返。咁富不與官爭，富貴議員都敢怒不敢言，好一個田少，唔止向李少光投訴班狗仔隊，仲用四個字回敬佢哋──「關你乜事？」
敢於得罪驕貴嘅AO之外，田少仲勇敢到公開同記者講：「我老婆從來唔敢問我去邊度街，幾時返屋企啦，佢哋係我邊個呀？」嘩，真係夫綱大振。天下怕老婆嘅男人都應該封田少做偶像。
田少同田太恩愛非常，剛剛至去遊埠慶祝結婚35年。田少話自己發老脾時田太會唔睬佢半粒鐘，你估今次「唔敢問我去邊」嘅言論傳遍中環之後，田太有乜嘢招呼佢呢？