大馬主吳守基捐錢二百萬元畀特區政府籌辦二○○九年東亞運動會,好唔話得。吳守基名下有一匹「馬友寶」,長途實力強橫,係左丁山心目中今季之「銀行馬」,吳媽媽有「通勝」及「新通勝」係冷門取勝分子,不可或忘……吳守基係紡織界人物,與「星哥」陳耀星等朋友組成「詠湛」賽馬團體,養咗兩匹「友活力」、「友實力」,實力就比較次一皮,唔使吼到實。吳守基係喇沙校友,而喇沙素以體育運動著名,所以佢係體育發燒友,一啲都唔奇。
東亞運動會若果唔係在澳門舉行,香港相信冇乜人會注意到,睇有線電視直播一啲比賽,唔知係唔係鏡頭關係,田徑場上觀眾席,足球場上中日大戰,籃球場上中國對南韓,硬係唔見咗一啲嘢,就係觀眾嘞,啲觀眾去咗邊呀?想深一層,澳門人口少,個個要返工返學,唔得閒去睇,遊客去晒葡京、金沙,唔會去睇,於是看台上小貓三四隻,好似旺角球場睇香港甲組足球咁多人,全無氣氛。