明年2月底「登六」榮休嘅金管局副總裁彭醒棠（Peter），嚟緊星期日將榮升做新老爺，認真可喜可賀。
適逢上周五（20號）財資市場公會（TMA）喺灣仔君悅酒店舉行10周年晚宴，成班銀行界炒房阿頭兼TMA理事會執委，齊齊上台合唱《千千闕歌》送畀Peter，提早祝賀佢榮休嘆世界兼娶新抱，場面頗感動。

阿仔籌備婚禮無現身

一眾獻唱賓架，包括滙豐資本市場亞太區聯席主管陳紹宗（Justin）、中銀香港（2388）投資主管陳少平、恒生（011）執董馮孝忠、花旗香港及澳門區行長盧韋柏、國際企業財資（中國）協會創會主席黃偉民等等，仲有明年接替Peter職務嘅金管局助理總裁李達志㖭。
唱完一曲，眾人在台上跟彭醒棠輪流握手，各銀行嘅交易團隊又跟佢合照，足證Peter人緣甚佳，雖然今時今日銀行越來越難撈，但仍然見到人間有情！
音樂細胞爆棚嘅Peter，以往多數聯同金管局與按證公司同事組成嘅Live Band，為TMA周年晚宴伴奏，佢喺法興任職嘅乖仔Karon，亦係樂隊鼓手。
Karon快將要娶老婆，最近忙住籌備婚禮，呢晚唔得閒現身，成隊Live Band竟然都冇出現。聽聞，佢哋正在秘密練兵jam歌，準備喺Karon嘅婚禮上，畀一對新人一個surprise！
華華在此都講句恭喜晒先。

李華華
mailto:[email protected]