白鴿黨前日宴請港澳辦副主任馮巍，選擇喺和記大廈「潮庭」開餐，好多人奇怪為乜選呢度，八方打探之下，原來除咗地點方便，另一個原因其實都係錢作怪！不過又咁啱原來馮巍都好like潮州菜，仲極之欣賞其中一樣甜品，食到唔停口。

「嘈到個墟咁」難偷聽

卿姐同八方講，原來佢當日同助理傾過，認為請人食飯都好，都唔想食得太貴，所以左揀右揀之後，先搵咗一圍埋單只要5,000蚊左右，又近港鐵站嘅酒樓。不過卿姐就話當日去到，先知原來冇訂到房，酒樓就咁搵咗幾塊板，圍住佢哋同馮巍張枱就算，但係因為現場「嘈到個墟咁」，而馮巍講嘢又好斯文、好陰聲細氣，所以白鴿黨仝人全程都要豎起隻耳嚟聽，卿姐仲講笑話，喺咁嘈嘅環境下，相信其他人要偷聽都好難。
咁呢個「馮巍餐」有乜嘢食呢？八方拎到個菜單，有滷水鵝拼盤、豆醬焗大蝦等，都係一般潮州嘢，但想唔到馮巍最鍾意食嘅，竟然係甜品晶瑩紅棗糕，話覺得呢個糕「好煙韌、好好食」，搞到卿姐都問馮巍：「使唔使叫多籠」？馮巍則客氣話唔使嘞。據知馮巍亦好禮貌，每當有人發言，都先停筷聽完先再開飯。據知馮巍此行除咗見白鴿黨，亦約見咗中聯辦同特區政府官員喎。