三位名嘴封咪，全城哄動，兩句口語，傳誦一時。一句就係飛哥喺立法會講嘅：「唔同層次，唔同級數。」另一句就係成教授問候飛哥老婆及女兒、對曹仁超講：「Howisyourdaughter?Howisyourwife?」大家以後唔好立亂問候相識（acquaintance，唔係friend）嘅賢淑太太及靚女呀！
名嘴封咪，抹黑謠言滿天飛，旨在打擊名嘴聲譽。呢個星期喺中環聽到上流社會流傳三個講法：（一）飛哥收咗水，就快搬上山頂豪宅；（二）大班收咗兩百萬，借意鬆人；（三）毓民收咗一千萬美金，急急離港。三個謠言都有一個共通點，磅水嗰位好闊綽嘅仁兄係城中巨富。

飛哥聽到傳言，為之媽媽聲，因為佢幾時都有資格住上山頂，𠵱家住響九肚山，都唔知幾舒服，住山頂使乜人哋畀錢！大班聽咗謠言，哈哈大笑，因為兩百萬係乜嘢錢，佢隨時都可以拎畀人；毓民唔知去咗邊，俾人唱到黑，惟有捱打。毓民負債，並非秘密，佢自己喺電台電視台公開講咗幾次，已經街知巷聞，自己做商台節目、開麵舖，都係為咗還債而已，走咗反而冇收入。如果有個闊佬肯畀佢一千萬美金，就發達咯，可惜一千萬日圓都冇收過呢！
呢啲謠言，對城中巨富極不公平。佢有乜好理由猛咁磅水畀名嘴？俾人指呀？邊個指得佢郁？大拿拿咁多錢，巨富因乜事要明益名嘴？香港已變成陰謀論城市，而且香港人除咗錢之外，唔多明白其他道理，好多上流社會人物以為有錢乜都可以搞掂，所以上述傳言十分流行，令到三個名嘴氣頂之外，巨富如啞子吃黃連，俾人屈得就屈，點會happy！