周秀娜近排顧住拍內衣廣告搵銀,冇時間陪男友陳偉成(Avis),咁啱Avis早前被偷影到背住娜姐偷嗒𡃁模Vivian,娜姐梗係火都嚟,Avis呢排修心養性乖乖同籃球隊友為伴,佢前幾日去打波就唔小心左腳拗柴,睇完跌打都冇用,腳眼同腳面都腫晒。娜姐咁啱又返咗內地做嘢,Avis前晚惟有搵兄弟送佢去醫院照X光,好彩冇骨折,Avis噚日話:「不過都唔行得住,要用柺杖,仲要敷冰消腫,同埋會戒口。」
娜姐嘅新書下月就喺台灣推出,Avis拍心口話:「我至少訂購50本,唔多過佢啲粉絲點叫支持。」娜姐噚日喺內地做嘢,唔能夠貼身照顧男友,佢識做咁影咗倒D奶性感相放喺Instagram,隔空呵番Avis。
撰文:洪紅克