吳綺莉同個女卓林嘅關係仍然膠着，早前報警搵女，又話有一段時間冇同卓林見面。不過吳綺莉就冇忘記佢已經離世嘅媽媽鄭黎明，近日為圓亡母嘅心願，喺香港搵到一個有山有水嘅基督教墳場骨灰龕位，將母親骨灰移放喺嗰度。吳綺莉噚日喺fb留言：「謝謝教會的幫忙，家人和母親60多年的好朋友，母親終於回港安息了，感謝天父感恩每一天。」

噚日打電話畀吳綺莉，佢話好感恩：「唔係乜風水地，基督教唔講風水。因為我係外公湊大，外婆都係葬呢度，之前我去拜祭時見起緊龕位，2015年起，舊年啱啱起好，我就入紙申請，最後終於申請到，真係好感恩！阿婆同阿媽可以葬同一個場，兩個龕位只隔一條路，我去拜都好方便。」

「了咗件心事」

吳綺莉嘅媽媽2015年喺上海離世，當時吳綺莉要帶骨灰過海關，佢表示驚到好似做賊，佢帶笑話：「其實我都問晒入境處話冇問題，但內地嗰邊唔知點，我好驚佢叫我拆晒啲嘢出嚟，好彩過程都好順利。喺清明節前已經接咗佢返嚟，仲放咗喺我屋企一段時間，基督教就冇話唔放得。今次叫了咗件心事，我做女嘅都盡做啦，搵得番阿媽以前60幾年前啲舊同學，佢哋都好有心，同埋我大表哥一齊，幫阿媽做咗啲儀式上位。」
撰文：馮仁昭