當年的亞洲四小龍：香港、星加坡、南韓、台灣，以至後來嘅中國大陸世界工廠，最尾拍板能夠成事嘅大佬，like it or not，都係美國。經過今次「世界」大亂後，啲美國大佬除咗講到鬼死咁似層層嘅de-globalization之外，究竟佢哋如果要再揀卒嘅時候，今次又會揀邊個呢？好多個國家名喺呢個時候都續漸浮現：墨西哥、台灣、越南、印尼、星加坡、印度等等。

金融方面，對美國嚟講，咁多年嘅基石，香港實在難以替代。睇吓上面嗰list，試問邊個真係做到香港在金融方面嘅scale和efficiency？如果要代替，可能就係俾搞咗咁多年，今次卒之俾佢冷手執個熱煎堆嘅新加坡。但係，新加坡咁多年都係兩頭蛇，美國佬會唔會壓重金融籌碼還是未知之數。

至於其他如製造業、加工、外工、corporate outsourcing、selective technologies之類又會搵邊個上榜呢？製造業和代工之類，睇嚟墨西哥就好似美國嘅深圳，唔多唔少今次都會再分多一杯羹。

至於台灣，除了繼續做佢嘅selective technologies之外，點解咁多年都係只可以做到去大陸做台商？在國際市場上淨係得一個郭台銘？如果講家族生意，台灣其實真係做得唔錯，無論在設計、加工、成本管理方面都做得好。在生產線方面，過去廿幾年自從WTO俾大陸入咗後就無乜好日子過，但好多家族生意由於山大斬埋有柴都仍然在台灣活着。你同佢哋嗰伯爺坐低開會，在業務討論上，還是有其精辟的見解，井井有條，不單止在營運，就算談到去the next steps forward 的vision，佢哋完全答到你。但係，咩嘢原因令台灣咁多年missed the boat，做嚟做去都係只可以「做好做精」卻未能夠做大？咁多年同咁多families傾過之後，講到尾都係在於運用資本財技的膽色不夠。好奇怪，台灣老闆去到大陸會夠膽拍心口把一半股權交俾「相熟」嘅大陸股東，完全無問題。大陸地皮一塊塊咁買嚟起廠，都無問題，但同佢哋傾怎樣利用國際資本市場籌集資金去實行業務計劃時，大部份都會打退堂鼓。淨係睇下在美國掛牌的ADR，除了台積電外，仲記得有邊間？台灣要做大，在金融方面必須要做到起碼有香港嘅scale和sophistication的一半先可以再傾落去。如果廿年前有大陸佬嘅一半膽色，今日又使乜淨係喺度生産口罩？

下一個看來會藉着今次危機會慢慢上位嘅係印度。點解？因為終觀無論在人口、人力、製造、代工、英語能力、文化接軌、corporate outsourcing和潛在的金融競爭力，印度都有機會做到和大陸抗衡。印度和大陸最大嘅分別就係印度軟件能力比硬件強。咩嘢叫做軟件強？唔係programming 軟件呀！睇吓外資行上到executive level的係印度人多還是中國人多，你就知咩嘢叫軟件強喇。印度要做到與大陸抗衡，整個國家嘅硬件infrastructure 反而要迅速啟動改良。另外，揀卒最重要嘅係唔可以同sanction list上或將會上sanction list上的國家行得咁埋。要証明呢點，印度看來越嚟越做到了。

遮打道口水佬

investMAN
For People of Style & Substance
掌握理財智慧 感受生活品味
http://investMAN.hk