向來好受網民歡迎嘅自由黨榮譽主席田北俊，最近又有新猷，就係開咗個Ig新戶口，同年輕人嘅距離，又拉近多一步。田少嘅Facebook向來多以時事抽水談笑一番，至於Ig嘞喎，相信就係輕鬆生活化一啲，而佢嘅首個Ig po都幾嚇人，皆因田少貼咗張喺醫院手術室嘅相，留言"Getting ready for my surgery."，雖則舉起v字勢，但友人粉絲見到都好擔心噃。

八方問過田毛毛，佢話田少嘅膊頭同手臂之間嘅韌帶撕裂，所以喺三藩市做手術，但田毛毛報喜，個手術好成功，叫大家唔使擔心。一如田少自己hashtag，「祝我快啲好返」，唔少friend都祝田少"get well soon"。而田少手術後亦即時喺Ig向大家報平安，話手術好成功，但稍後一段時間要用繃帶托住右手手臂，所以要用左手打字咯。

如果要跟進田少康復進度，不妨follow佢Ig：james_tien。