後傘運時代，政治氣候曾湧現新景象。2015年區議會選舉多了很多新面孔，當日以22歲之齡當選為最年輕「區佬」的黃學禮，自言初期曾被不少街坊認定是「搞事黃絲」，上任後如何打動街坊？「做咗2年唔少跟進地區議題、投訴我都有做，起碼街坊睇得出你係做嘢先啦……而家冇乜人會話我落區搞事，係有改變嘅，比起啱啱開始改變都唔細。」

現年24歲的中大政治及行政學系畢業的黃學禮，來自傘後組織「沙田社區網路」，沒有政黨支持下，靠開街站擊敗盤踞沙田松田區16年的公民力量鄧永昌。新手的第一個難題，就是尋找辦事處。東區「拔根」的區議員徐子見曾受「永續辦公室」之苦，尋覓多時才有一個像樣的議辦，期間曾開設「外勤辦公室」應對。黃學禮亦同樣，初期開設「流動服務站」，花了半年才成功租用現時的議辦，因位置偏僻曾引來街坊抱怨，「所以我都係擺街站多，不過擺出街仲好，啲街坊搵得到我，呢度（議辦）我用嚟擺嘢多。」

日久證人心，落區的確帶來轉變，至少令人明白他的理念，「（參選時）佔中之後，好多人都覺得你落嚟一定係搞事呀、暴民呀，到而家（街坊）就冇乜呢啲睇法；初頭多數人都唔理你，而家唔少人認得自己，街坊都有唔同政治立場，會盡量同佢哋解釋，求同存異啦。」外表較成熟亦變作優勢，區內街坊愛稱呼他為「黃議員」，他笑言「福兮禍所倚，你個樣老啲殘啲，啲人就覺得你好似成熟啲，唔會覺得你係仔就唔同你傾。」

他回顧2015年選舉後，沙田區的非建制區議員多了約1倍，而工作模式亦有變，「以前啲議員可能有個會面時間，而家街坊一個電話一個whatsapp就搵到你；一日平均都有20幾個電話，有突發事會多啲，試過有噪音投訴，凌晨2、3點都收到電話，會盡量去做」。曾經有噪音問題持續，他便要到現場「潛伏」，「要捕到發生噪音嘅時間，睇下勸唔勸到佢，唯有係咁。」

現時沙田區議會泛民和建制議席比例是19比20，看似「唔夠票」，他則認為有一種制衡作用，「好處係好多嘢可以傾到，例如大埔區（建制）比例大，一地兩檢嗰啲就可以拎上（區會）去投票通過；我哋呢度比較近，因為知道要傾好耐，或者阻力好大，佢哋都唔敢亂咁拎啲爭議性議題上嚟，個bargaining power差好遠。」

深耕細作需要時間，亦需要努力和耐力，「當然希望多啲人做地區工作，但地區工作時間較長、較仔細又未必講政治議題，未必咁多人出嚟選。」他和民主派朋友已預料，下一屆選舉競爭更為激烈，「唔容易嘅，始終佢未必會想你攞埋嗰一席攞埋個主席，而家政府好多議案立場都係『18區區議會主席一致擁戴』，佢唔想做唔到呢個『全力支持』效果……困難一定係嘅，但當然唔可以放棄繼續做。」資源不夠便以勤力補上，他相信只要有心服務地區，「就唔難令街坊明白你。」