港台「十大中文金曲頒獎典禮」除咗十優歌手變十一優，十大金曲獎都變十二首，第5及第7位都鬧雙胞，包括第5位有Gin Lee《很堅強》同Supper Moment《橙海》，第7位有許廷鏗雖《停半分聽一闕歌》及謝安琪《一個女人和浴室》，失落十優歌手嘅許廷鏗得金曲獎時表示：「多謝港台，為呢首歌我走勻好多地方宣傳，同好多人交流，自己由細到大聽廣東歌，其間兩年轉學校停咗聽廣東歌，多謝大家為廣東歌努力。」

之後許廷鏗在後台接受訪問時話：「好開心，因為呢首歌做咗好多宣傳，覺得依家宣傳歌曲唔係淨係平面咁去做，而係要同啲歌迷多啲互動。」

對於失落十優歌手獎，佢就話：「我唔覺得係失落，年年都有好多歌手，有好多唔同嘅可能性，台上面每一位歌手其實都好努力，我唔會用『失落』去形容。」

此外，講到早前張栢芝幫手拍宣傳片，問到許廷鏗知唔知當時栢芝生咗未？佢話：「其實我儍更更乜都唔知，係睇報道先知。」

咁當日見到栢芝有冇覺得有啲水腫或者有孕味？佢就話：「其實我係巧合見到佢。屋企人都教過我對於女孩子見到面時唔好問佢係咪有咗或者其他嘢，因為咁係唔太禮貌，唔通話人哋肥咗咩？所以我冇問，我淨係知佢有聽我嘅歌，對我嚟講已經好難得、好開心。」

幾時見到栢芝？許廷鏗話：「大概一個禮拜前左右，我唔覺得有任何跡象（大肚），佢仍然係好靚好索。」至於點解會巧合見到栢芝？許廷鏗就解釋：「其實我一直間唔中都會同佢嘅經理人聯絡，嗰一日係同佢經理人見面食飯，估唔到都見到佢。」

栢芝有冇同你報喜？許廷鏗話：「冇講啲乜，個『喜』其實就係佢幫我宣傳。」至於食飯時有冇傾過關於BB嘅嘢？許廷鏗話成餐飯都係傾音樂上嘅嘢，栢芝仲同佢講有買佢嘅碟，搞到佢非常開心。

精選娛聞，喺晒《娛果》
http://fb.com/appledailyent