大台劇近年套套大灑有味鹽花，無啦啦都有強姦戲同床上戲嘅情節，不過今日傳出TVB出通告禁藝人性感，就連劇中性感look都要「點到即止」，咁有時女藝人為咗保住飯碗，就算唔想性感都要頂硬上嘅情況，應該可以改善。

朱晨麗知道公司最新守則，佢回覆傳媒：「我相信呢個指引都係想保護啲女藝人，我覺得健康地性感仲好！」

陳偉琪拍《誇世代》淋香檳喺身，色誘陳豪，又喺大台節目《三日兩夜》着比堅尼，不時有性感演出，佢今日回應傳媒：「我覺得公司此舉是為女藝人得到更多保障，不過過往節目及劇集中，鏡頭前性感打扮都是因應角色及劇情需要，而且電視跟電影不同，尺度好有限，我自己同唔同監製合作，佢哋都好好，溝通清楚個角色設定，同埋性感都算是有限度。我成日都講我做演員都係盡好本份，做好角色要求，其他啲嘢都冇諗。」

龔嘉欣甚少喺劇中行性感，對於公司嘅新安排，佢回應傳媒：「我收到公司通告，相信公司都係為咗保障藝人，所以發出咁樣嘅指引，咁樣對所有人都公平，但是有時拍戲同拍劇，難免有性感演出，相信都係因應劇情同畫面嘅需要，我覺得某程度係可以接受，最緊要係拍戲嘅對手，大家有溝通，更重要是相信大家嘅專業。」

更多娛聞，喺晒《娛果》
http://fb.com/appledailyent