噚晚港視劇集《選戰》第十五集大結局，唔少人睇完之後不禁抽了一口涼氣:「完喇？」openending，只知宋漫山同葉晴之間總票數係相差2,200票，而喺最後公佈新界東投票結果時，宋漫山喺其餘四區，包括港島、九龍西、九龍東同新界西，此四區合共取得之票數，係多過葉晴3,147票。咁究竟公佈埋新界東之後，會係葉晴後來居上多咗成5千幾票，定係宋漫山毫無懸念勝出？要等睇《選戰2》，但未必開得成喎！

播得openending……都預咗觀眾批評。一星期一集，話晒都等咗十五個禮拜，只係想知道邊個贏出，點知……網民反應，好直接：

「癸龍bb生定死呀？葉晴贏定輸呀？咁叫結局？」

「就算美劇都唔會喺咁重要嘅位留白啦（張癸龍下落不明就ok），睇咗咁耐始終要reward返觀眾。又有人話openending等觀眾自己決定。咁做其實係編劇無信心嘅表現，你之前講到選舉工程影響有幾大，咁選舉結果應該反映選舉工程做得好唔好。事實係我睇完十五集都唔知葉晴宋漫山有咩政綱、行咩形象，劇中嘅香港人又buy唔buy。」

「結局的問題係，1.用高潮位做結局，即使唔打算公布當選人，最起碼應該花時間描繪點票中心各人的心理狀況，各區拉票情形，好讓結局唔好end得咁快。我認為全劇16集更加好。
「2.老廉嗰一part唔應該放喺臨近尾聲的位置，呢一單選舉危機應該有一點著墨，包括係女主角點樣擺平、點樣被揭密、點樣廉署交手。更加理想係放係較前的集數。
「3.既然開頭幾集有女主角係街頭籌款的一幕，點解唔花時間講下男主角的手下如何『動員地區樁腳』、『動員鐵票』？有具體刻劃的地方好似只有送錢俾工人黨一幕。」

「結局處理手法強差人意，編劇選擇在高潮時用openending作為終結只會給人劇情不完整、缺乏方向的印象，尤其是觀眾在追看了十多個星期而劇情已被拖長的情況下。如果是要為《選戰II》舖路，這只會是更差的舖排，因劇情將被拖得更長而失去節奏感。觀眾對大結局失望是合理的。我本來對選戰一劇充滿期望。希望編劇能汲取意見，將來編更好的劇本。」

「要拍第二季冇問題，但你地冇理由咁樣收尾囉。」

「《警界線》就睇到一半X，《選戰》睇到最後嗰秒X，好X燥。你將最終極個答案放喺一個唔知幾時、唔知會唔會開拍嘅第二集。」

「我睇法係openending係最明智嘅。大部分觀眾都想葉晴贏，但現實係殘酷嘅。想當日，幾多人想唐唐贏？最後咪又係俾隻狼上咗位？！有時候使乜劃公仔劃出腸吖！真普選？咪又係得夢想兩個字！」

「好耐未試過認真追完一套劇而且會思考，老老實實，一直話套劇埋左咁多伏筆又唔交代，點解唔趁呢個機會自己思考一下，嘗試代入角色去諗下會點做。」