香港律師會噚日向會員公布，前律政司司長梁愛詩已經喺今個月1號重歸以前嘅姚黎李律師行，鋪屎係consultant，即係做啲乜？收入有幾多？八方噚日本住八卦精神，打電話兼電郵向詩姑查詢，但佢冇睬八方。
問責高官雖然唔係公務員，但係為咗避免利益衝突，佢哋退休之後嘅一年之內，替私人公司打工，或者合夥做生意，都要經過政府委任嘅獨立委員會審批。詩姑係喺去年10月正式離任嘅，即係話佢已經過晒冷河，無人可以阻佢發達。
詩姑今次乃係重操故業兼夾回歸母體，事關佢喺1993-97年就係任職姚黎李律師行嘅。不過唔知點解，喺律師行嘅網站上面，詩姑嗰頁簡介，完全冇提到佢係前律政司司長喎。