日本組合KAT-TUN舊將田口淳之介單飛後首度訪港，昨晚假九展舉行見面會，活動於晚上8點正準時開場，佢甫開場即勁歌熱舞獻唱《DIMENSION》、《QI》、《Connect》，其間用廣東話講：「大家好！Hong Kong！」當佢唱罷頭三首歌曲即自我介紹：「我係田口淳之介。」佢自言緊張到差點唔記得點講，田口淳之介對上嗰次已10年前來港，有台下粉絲都話當年有追星見偶像。

田口淳之介大顯親民作風，全晚均有同港迷交流，更安排答問環節，有粉絲問到係咪鍾意食甜品，田口就話愛食凍豆腐花，之後又用廣東話向fans示愛，更有泰國擁躉專程來港撐場，表示等咗15年終於見到田口，希望偶像可以到泰國開見面會。田口表示自己唔止有女fans，獲男性支持都十分開心。

田口亦有用木結他自彈自唱兩曲《On The Moon》、《CRIMSON》，其後披上和式服裝唱出《GOEMON》、《GONG》，佢透露已經獨立發展近一周年，揚言要參與更多公開活動，本月18日會到上海見fans，田口在台上不時講「多謝」冧fans，並談到今次接受香港傳媒訪問時，無論電台、報紙等媒體都不約而同提起《Legal High》，發現原來香港人對佢喺《Legal High》中嘅角色印象深刻，佢承諾會再拍劇演戲，並表示一定再嚟香港，隨即再晒廣東話：「你愛我嗎？」當唱到最後一曲《Lovers》時，田口不單止任全場歌迷用手機拍照，仲驚喜落台親親fans，十分識做。