當年今日
關於我們

中國人壽(2628)
錯將止賺位當止蝕

蘋果日報 2007/11/19 00:00


讀者任小姐推介中國人壽(2628),原因好簡單,「中人壽跌咁多,3至4個月應該可以返上53至54蚊。」
國壽噚日收42.6蚊,由10月底嘅高位52蚊跌落嚟,的確跌咗好多,任小姐分別喺36蚊同42蚊左右買入。
任小姐亦為國壽定下42蚊止蝕位,不過,對於呢個止蝕位,沈振盈一句到尾:「有可能今個禮拜已經掂到!」沈振盈仲話,今年國壽可以由高位回落40%,所以「呢一浸調整,國壽有機會落到低位約35至38蚊。」
定錯止蝕位唔係冇原因,任小姐話,42蚊呢個止蝕位,早喺36蚊買入時已經set定,點知升到上52蚊都唔捨得放。沈振盈一語中的:「技巧你有,但你唔明,你呢個(42蚊)係止賺位!」
長線唔代表唔理波動
今年46歲嘅任小姐話,「我買嗰陣時又唔係諗住短線,逐步逐步買諗住用嚟退休。」以為長線持有唔需要介懷中間波幅?沈振盈話:「for退休揸十幾年,國壽可以慢慢反覆上升。問題係,究竟係中長線,唔需要理會中間波動,定係你都要掌握中間嘅高低節奏。年初時,國壽上A股,曾經試過由28.8,跌到落18個幾,呢類股份個波動性都會好大。」
對於任小姐嘅持股策略,沈振盈話:「你混淆咗自己買賣方法,將長線同短線方式混淆,記住長線唔係『死固固』,學有啲人話齋,鎖喺保險箱乜都唔睇,因為始終有基本因素轉變,形勢唔同,國壽最大轉變係佢嘅回報,主要靠投資收益,而投資收益大部份嚟自A股,所以要睇盈利要睇住A股H股表現,決定係咪止賺。」

《買入價》
任小姐建議:36元增持 專家回應:38元
以下收集

《目標價》
任小姐建議:53元 專家回應:─

《止蝕價》
任小姐建議:42元 專家回應:35至38元

《時間》
任小姐建議:3至4個月 專家回應:─
empty
波司登(3998)
師奶都係聽消息
楊太推介波司登(3998),佢自己喺波司登10月11號上市當日,買咗10手,當日收市價3.41元計。波司登早已跌穿招股價,楊太仲推介呢隻股,「你知師奶都係聽消息!」佢聽到「有大財團注資。」根據資料,並沒有大財團入股波司登嘅相關消息,只有大行唱好嘅報道。對於呢隻股,黃敏碩就嫌「目標不夠集中,未來前景不明朗,呢隻股唔吸引。」
等升穿招股價再買未遲
波司登股價上市第一日曾高見3.86蚊,但到今日繼續尋底。沈振盈強調:「抽新股要有策略,如果新股喺上市頭幾日,無論炒高或跌穿招股價,都要離場計數。」佢建議楊太如看好波司登,應該等呢隻股再升穿招股價先買都未遲。不過,家陣最好都係換馬,買入其他升值潛力較高嘅股票為上算。
首長國際(697)
90倍PE有啲貴
太古城陳先生推介從事鋼材生產及貿易的首長國際(697),係3.19元水位入咗貨,佢話睇好行業前景,特別係做船用嘅鋼板;加上股神畢菲特亦重手入股韓國POSCO(南韓最大鋼鐵公司)。以此比較,兩公司業務性質、行業、前景應差不多,所以首長應該okay。
不過,沈振盈提醒陳生,首長嘅鋼材業務已經發展咗好多年,現時歷史市盈率(PE)接近90倍,「似乎有啲貴」。未來船舶建造對產品嘅需求好大,「前景有,但覺得過去一年股價嘅升幅,某程度已經反映咗」。
南海石油(076)
股票行收風有得炒
荃灣Cathy建議買南海石油(076),佢話自己分別喺0.14至0.16元分段買入。Cathy向大家爆料:「係喺股票行聽到嘅貼士。」Cathy曾經喺呢隻股身上賺錢,所以夠膽再次追入。
沈振盈話:「我喺87年股災前曾高位沽出,到咗二十年後嘅今日都未見過隻股返上當年高位。」佢認為,南海石油業績喺呢二十年嚟未見起色,每次只係靠消息借勢炒上,所以建議Cathy收到消息,不妨上車炒一轉,反之就不宜沾手。

http://appleactionews.com/features/finance/
empty