病毒當前，理應人人平等。之不過唔知元朗幾位民政處職員喺咪坐定粒六，覺得自己好安全、一定唔會中招。今日元朗區議會召開交通及運輸委員會嘅時候，民政處職員要求區議員分隔1.5米坐，搞到部份區議員要坐埋喺公眾席開會，又要輪流使用咪高峯發言。咁高規格嘅防疫措施當然係好，只不過元朗區議會主席黃偉賢就發現，佢哋同一班政府官員喺另外一間會議室開會嘅時候，就冇做同等嘅防疫措施啦，莫非佢哋只許州官放火，不許百姓點燈？

最近確診數字維持喺雙位數，做好啲防疫措施，相信大家都會體諒嘅，但八方就唔明白點解唔同人要用唔同嘅防疫措施？黃偉賢都同八方呻，今日一入去會議室已經見到大部份嘅座位，俾人用牛皮膠紙交叉咁封起晒，又要求佢哋隔開兩個座位坐，「當我哋係小學生定係幼稚園學生？」搞到部份議員要坐埋喺公眾席開會。

由於公眾席冇咪高峰畀區議員發言，秘書處職員就安排佢哋輪流使用咪高峯發言。黃偉賢就質疑，要求一班區議員輪流使用同一個咪高峯，喺冇手套嘅情況底下，咁咪好容易會交叉感染病毒？

本身諗住去隔離房搵民政處職員理論嘅黃偉賢發現，會議室內嘅民政處職員同一班政府官員開會嘅時候，竟然冇做類似嘅防疫措施，於是質問佢哋點解有唔同嘅安排，有要求佢哋提供多幾個咪高峰畀區議員使用。點知元朗高級行政主任彭家芳突然大放厥詞話：「我理得你哋！」

對住態度咁囂張嘅民政處職員，黃偉賢真係冇咁好氣，為咗避免因為用同一個咪容易交叉感染，佢堅持一班區議員分隔開一個位坐，用返獨立咪高峯發言，繼續進行會議。

元朗區議員王百羽同方浩軒都對民政處嘅做法失笑。王百羽喺社交網站質疑，「係咪政府公務員就唔需要防疫？係咪只要係黨秘書就可以凌駕所有嘢？」方浩軒直頭形容今日嘅區議會好似俾人「抄家」咁款，仲話「其實世上無完美嘅抗疫措施，但起碼係合乎常理同有科學根據囉。」

元朗民政事務處後來覆八方話，民政事務總署喺8月4日已經通知咗黃偉賢，有關秘書處嘅最新會議安排同相應嘅防疫措施，聲稱「秘書處正準備完善會議環境及設備，令會議在最新安排下可以更順暢進行」。但係點解民政處職員自己開會就唔使保持社交距離等，當局就冇解釋。